O xoves 22 de agosto de 2024, ás 22:00 horas, no TEMPLETE DA MÚSICA DE VILALBA, o Instituto de Estudos Chairegos, coa colaboración do Concello de Vilalba, organiza o III CONCERTO DE VERÁN no que intervirán o dúo SHERA & SILE e o grupo DÚBIDA.
Xa dende as 21:00 haberá sesión de DJSET a cargo de 2PAZ & CHILESSEN
Entrada libre e gratuíta
Shera & Sile, Duarte e Anxo, son dous artistas e irmáns de Vilalba que comezaron a publicar as súas primeiras cancións de rap no 2020. En plena pandemia, nace o colectivo Breaking Bars, que formaron xunto con outro artista e amigo, G Cavalli (Lois Gayoso). Este proxecto remataría no ano 2023.
É nese mesmo ano no momento que comezan a sacar un maior volume de música de forma máis constante e sempre en conxunto, enfocando o seu traballo dunha forma máis seria e coidada. As súas letras, en galego, fan referencia en moitas ocasións ás súas orixes e vivencias, evidenciando nas mesmas dende os seus sentimentos ata o seu pensamento sobre certas inxustizas sociais.
Entre as súas influencias podemos destacar principalmente o rap español, principalmente o colectivo madrileño Ziontifik, xunto con outras figuras máis recentes como Ergo Pro, Ill Pekeño, Las Ninyas del Corro ou Nico Miseria. En Galiza, fixáronse e sentíronse identificados dende novos coa música de Rebeliom do Inframundo. Nos seus directos forman equipo xunto a outro vilalbés, 2Paz (Jesu Paz), que os acompaña como DJ durante os mesmos.
Dúbida é unha agrupación musical que xorde en outono do 2021, na capital galega.
Este proxecto naceu de cinco amigos con ansias postpandémicas de facer música, e de deixar a súa pegada no panorama musical e cultural.
Cada un deles, conta cunha longa experiencia enriba dos escenarios, pasando por diferentes grupos, ata que finalmente, Dúbida consolidouse como a súa filla predilecta.
Dende o funk, soul, blues, e bebendo ata do jazz, con temas propios e versións que animan a calquera, ofrecen baile, festa e un estilo único para que non esquezas os seus directos.”