Categoría: Comunicados

O INSTITUTO DE ESTUDOS CHAIREGOS, como entidade solicitante, quere expresar publicamente a súa máis fonda satisfacción pola aprobación, no Pleno do Concello de Vilalba levado a cabo esta tarde, do acordo polo que a Biblioteca Municipal da nosa vila pasará a denominarse Biblioteca Municipal “Agustín Fernández Paz”. Congratulámonos deste xusto recoñecemento a quen, ao longo da súa traxectoria vital e profesional, demostrou un compromiso firme e continuado coa nosa lingua, coa nosa cultura e coa nosa terra. A decisión do Pleno honra a memoria e o labor dun vilalbés ilustre, cuxa pegada no eido cultural e humano permanecerá viva entre nós. Queremos tamén agradecer ao Pleno do Concello de Vilalba a sensibilidade amosada coa veciñanza e co legado de Agustín Fernández Paz, e celebrar que se dea así cumprimento ao que establece o Regulamento…

O Instituto de Estudos Chairegos de Vilalba quere expresar a súa fonda satisfacción polo acordo da Real Academia Galega de dedicar o Día das Letras Galegas 2026 á escritora, xornalista e activista feminista Begoña Caamaño. Consideramos esta decisión un recoñecemento merecido a unha figura que contribuíu de maneira esencial ao desenvolvemento da cultura galega desde múltiples ámbitos. A través da súa escrita comprometida, tanto no xornalismo como na narrativa, Caamaño abordou con fondura temas como a identidade, o poder, o feminismo e a necesidade de revisitar os mitos dende unha perspectiva crítica e actual. A súa obra literaria, encabezada por títulos como “Morgana en Esmelle” e “Circe ou o pracer do azul”, achega unha voz propia, innovadora e feminista á narrativa galega contemporánea. No eido do xornalismo, a súa traxectoria foi sempre unha mostra de…

O cineasta galego Oliver Laxe ven de ganar o Premio do Xurado no Festival de Cannes polo seu último filme, Sirat, consolidándose como unha das figuras máis singulares e recoñecidas do actual cinema europeo. Desde o Instituto de Estudos Chairegos de Vilalba queremos trasladarlle os nosos parabéns por este flamante premio,  polo seu talento e pola súa sensibilidade artística, agardando que veñan moitos máis! Noraboa!!! A XUNTA DIRECTIVA DO INSTITUTO DE ESTUDOS CHAIREGOS - VILALBA

Hai un cuarto de século nacía a nosa agrupación cultural, cun soño común: preservar, promover e celebrar a riqueza da lingua, a cultura e o patrimonio galego. Hoxe, 25 anos despois, seguimos firmes no compromiso que nos uniu dende o primeiro día. Para conmemorar esta data tan especial, o IESCHA presentou nun recente acto, o novo logotipo do 25º aniversario, realizado polo deseñador vilalbés Xurxo Insua, unha imaxe que sintetiza o noso percorrido e a nosa esencia. Nel, a tradición e a modernidade danse a man: as formas evocan as raíces culturais que nos sosteñen, ou en palabras do propio autor: “O deseño ten como referente a linguaxe tipográfica do logo orixinal do Iescha, de inspiración sargadeliana, no que as letras do nome compoñíanse en anagrama nun bloque vertical. É unha proposta que prima…

O INSTITUTO DE ESTUDOS CHAIREGOS-IESCHA quere manifestar públicamente o seu apoio a CARLOS CALLÓN, rexeitando o acoso e as ameazas que está a sufrir en redes tanto contra a súa persoa coma contra unha das súas publicacións. Neste sentido, compartimos a continuación o comunicado de AVANTE LGBT+ de rexeitamento ao referido acoso.

O IESCHA ven de remitir ao Concello o seguinte escrito de apoio á declaración da Feira do Capón de Vilalba como Festa de Interese Turístico de Galicia: "O Instituto de Estudos Chairegos quere expresar o seu decidido apoio á declaración da Feira do Capón de Vilalba como Festa de Interese Turístico de Galicia. Cunha traxectoria que supera os dous séculos, esta feira é moito máis que un evento: é un símbolo vivo da riqueza cultural e histórica da nosa vila.  A consecución deste recoñecemento suporía un importante impulso para preservar e promover as nosas tradicións, fortalecendo a nosa identidade cultural e garantindo que esta celebración continúe a medrar e a proxectar o nome de Vilalba con orgullo dentro e fóra de Galicia.”