Categoría: CONDOLENCIAS

VAISE UN DOS NOSOS! VÁISENOS MORÓN! Hoxe cústanos atopar palabras para despedir ao noso querido amigo Morón. Marcha un amigo, un corazón xeneroso que latexaba ao compás da gaita e do amor pola nosa terra. Morón foi gaiteiro por vocación e por sentimento. Un dos piares e fundador do grupo folk Xorima, importante movemento musical e cultural da época, co que levou a música tradicional a moitos lugares, sempre coa humildade dos grandes e coa paixón dos que cren no que fan. A súa maneira de tocar era identidade, era memoria, era emoción compartida. Estivo sempre fondamente vencellado á música tradicional galega, defendéndoa, coidándoa e transmitíndoa ás novas xeracións. Mais, por riba de todo, Morón era unha boa persoa. Amigo leal, compañeiro disposto, sorriso sincero e man tendida. Vaise un dos…

O IESCHA desexa expresar a súa máis fonda tristura polo pasamento de Xesús Alonso Montero, figura sobranceira da cultura galega. O recoñecido intelectual, falecido en Vigo aos 97 anos, deixa unha pegada inesquecible no ámbito académico e cultural do noso país. Membro destacado e presidente da Real Academia Galega, foi tamén un pioneiro nos estudos sociolingüísticos sobre a lingua galega, ademais dun escritor prolífico e dun firme e constante defensor do noso idioma. Desde o IESCHA, queremos lembrar tamén a súa disposición e proximidade, pois participou nalgunha das nosas actividades culturais, compartindo xenerosamente o seu saber e o seu compromiso coa lingua e coa sociedade galega, sendo ademais, para varios membros da nosa xunta directiva, un profesor admirado e inesquecible, deixando unha fonda pegada humana e intelectual, e sempre lembrado…

Desde o Instituto de Estudos Chairegos de Vilalba queremos facer chegar o noso máis sincero pesar polo falecemento de D. Bernardo Barreiro Fernández, pai da nosa presidenta, Marisa Barreiro Mejuto. Sabemos que son momentos moi difíciles e, por iso, a Xunta Directiva, en nome propio e das persoas asociadas, queremos estar ao lado da nosa Presidenta e da súa familia, acompañándoas na dor e enviándolles unha forte aperta chea de cariño, apoio e solidarie-dade. Que a terra che sexa leve, amigo Bernardo. Con todo o noso agarimo, A Xunta Directiva do Iescha

O Instituto de Estudos Chairegos de Vilalba quere amosar o seu máis fondo pesar polo pasamento de Manuel Lourenzo, e transmitir as súas condolencias a familiares e achegados. Manuel Lourenzo: escritor prolífico e premiado, actor, director, conferenciante, dinamizador de diferentes iniciativas culturais… pero, por riba de todo, namorado da lingua e do teatro. O seu traballo deixou unha fonda pegada, facendo que cada función fose tamén unha defensa do noso idioma e da nosa maneira de estar no mundo. Hoxe, despedímolo coa gratitude de quen sabe que o seu legado seguirá vivo, que cada escena e cada palabra dita en galego levará un pouco de el. Manuel Lourenzo, que a terra che sexa leve, e as mareas vivas non deixen de traernos o teu legado e o teu recordo.

O Instituto de Estudos Chairegos, ante o recente pasamento de Dª María Luisa Mejuto, nai da nosa presidenta, Marisa Barreiro Mejuto, quere manifestar o seu máis sincero e profundo pesar. Neste momento de dor, a Xunta Directiva, en nome propio e no de socios e socias do IESCHA, queremos acompañar a nosa Presidenta e a súa familia, facéndolles chegar unha forte aperta, o noso afecto e a nosa solidariedade. Que a terra lle sexa leve. Con todo o noso cariño, A Xunta Directiva do IESCHA