O Instituto de Estudos Chairegos de Vilalba quere expresar a súa fonda satisfacción polo acordo da Real Academia Galega de dedicar o Día das Letras Galegas 2026 á escritora, xornalista e activista feminista Begoña Caamaño.
Consideramos esta decisión un recoñecemento merecido a unha figura que contribuíu de maneira esencial ao desenvolvemento da cultura galega desde múltiples ámbitos. A través da súa escrita comprometida, tanto no xornalismo como na narrativa, Caamaño abordou con fondura temas como a identidade, o poder, o feminismo e a necesidade de revisitar os mitos dende unha perspectiva crítica e actual.
A súa obra literaria, encabezada por títulos como “Morgana en Esmelle” e “Circe ou o pracer do azul”, achega unha voz propia, innovadora e feminista á narrativa galega contemporánea. No eido do xornalismo, a súa traxectoria foi sempre unha mostra de compromiso coa verdade, coa lingua e coa igualdade.
Desde o IESCHA, animamos a toda a sociedade a aproveitar este vindeiro ano 2026 para redescubrir o legado de Begoña Caamaño e continuar profundando nunha obra que segue a interpelar e a inspirar.
A XUNTA DIRECTIVA DO INSTITUTO DE ESTUDOS CHAIREGOS – VILALBA
