RESEÑA DA CONFERENCIA DE CRIS FELPETO “A VIOLENCIA CONTRA A MULLER NA OBRA DAS ESCRITORAS GALEGAS”. 24-11-2023 (RESUME FOTOGRÁFICO)

A conferencia que na tarde-noite deste venres nos ofreceu Cris Felpeto, “A VIOLENCIA CONTRA A MULLER NA OBRA DAS ESCRITORAS GALEGAS”, estaba incluída no ciclo Mulleres Galegas que o Iescha impulsou ao longo de 2023, como ben explicou Marisa Barreiro, encargada de facer a presentación da conferenciante, da que salientou o seu extenso e brillante curriculo, non sen antes explicar o gravísimo problema que representa para a nosa sociedade a violencia de xénero, facendo especial fincapé no papel fundamental que todos e todas xogamos na loita contra a mesma. Marisa Barreiro destacou tamén a importancia de recoñecer a realidade deste problema e de rexeitar calquera discurso negacionista que ameace con banalizalo.

Neste contexto, a primeira parte da charla de Cris Felpeto resultou ser unha valiosa contribución ao coñecemento de infinidade de termos relacionados coa violencia machista: Violencia económica, psicolóxica, emocional, física, sexual; feminicídio, acoso sexual, violacion, mutilacion, ciberacoso, sexting, doxing… E tamén, a palabra clave: “consentemento”. Temas como a violencia visible e invisible, así como as formas explícitas e implícitas de violencia, foron tamén parte importante desta parte da conferencia.

A conexión entre a violencia de xénero e a literatura galega foi o aspecto principal da segunda parte, levando ao público polo camiño das escritoras galegas, en especial de Antía Yáñez e de dous dos seus libros: “Senlleiras” e “Non penses nun elefante rosa”, ofrecendo exemplos concretos dos mesmos, e propiciando e intercambiando opinións co público asistente.

“E que siga habendo moitas Antía Yáñez”, asevereou a conferenciante a xeito de conclusión.

En síntese, a conferencia foi unha experiencia enriquecedora e educativa, onde Cristina Felpeto conseguiu facer comprensibles temas complexos deixando unha moi boa impresión entre os asistentes.

Dende o Iescha agradecemos moi sinceramente a súa participación neste ciclo de conferencias e agardamos poder seguir contando con ela en futuros proxectos.

Moitas grazas tamén ao público asistente.

Ata a próxima!

Deixa unha resposta

O teu enderezo electrónico non se publicará Os campos obrigatorios están marcados con *

Esta web emprega cookies propias para o seu correcto funcionamento. Ao premer o botón Aceptar, aceptas o uso destas tecnoloxías e o procesamento dos teus datos para estos propósitos.    Máis información
Privacidad