Unha homenaxe visual á xenialidade dun artista: inauguración da exposición do gran Xosé Vizoso: UNIVERSO VIZOSO.
Na mañá deste marte 8 de abril, o Instituto de Estudos Chairegos, coa colaboración do Concello de Vilalba, organizou na Casa da Cultura de Vilalba o acto de inauguración da exposición UNIVERSO VIZOSO: unha escolma de carteis, ilustracións, fotografías e murais do recoñecido artista mindoniense XOSÉ VIZOSO, nunha homenaxe que busca poñer en valor a inmensidade da súa obra e a importancia do seu legado creativo. A mostra, cuxas obras foron seleccionadas por Aser Álvarez, de Arraianos Producións e comisario da mesma, conta co patrocinio e a promoción da Área de Cultura-Vicepresidencia da Deputación de Lugo.
O acto comezou coas intervencións das representantes das entidades organizadoras e colaboradoras: Marisa Barreiro, presidenta do Iescha; Iria Castro, deputada de Cultura da Deputación, e Marta Rouco, alcaldesa do Concello de Vilalba, que puxeron en contexto a relevancia desta mostra como tributo necesario a unha figura clave da arte galega contemporánea.
Aser Álvarez, comisario da exposición, antes de dar comezo á visita guiada, destacou o traballo de recuperación e posta en valor que supuxo esta mostra, facendo fincapé no impacto cultural e emocional da obra de Vizoso.
A continuación, xa na visita guiada, Aser foi comentando con detalle aspectos concretos das pezas expostas. O público asistente puido achegarse a anécdotas pouco coñecidas, amizades que marcaron a traxectoria do artista e influencias que foron modelando a súa visión estética. Cada cartel, ilustración ou fotografía revelaba historias e contextos que Aser ía describindo ata completar o percorrido.
Especial atención mereceu o mural do Furriolo, unha homenaxe de Xosé Vizoso aos presos do cárcere de Celanova que foron vítimas do franquismo nos anos da Guerra Civil.
A exposición, ampla e diversa, constitúe un testemuño dunha obra inmensa que agora recibe a visibilidade que merece. Trátase dunha cita imprescindible para quen desexe coñecer ou redescubrir a forza expresiva e o talento dun dos grandes nomes da arte galega.
Dende o Iescha, temos que agradecer moi sinceramente á Área de Cultura-Vicepresidencia da Deputación de Lugo, que pensase en nós para poder expoñela en Vilalba. Agradecemento que facemos extensible a Aser Álvarez, comisario da mesma, dándolle os parabéns polo seu magnífico traballo.
Moitas grazas tamén ao Concello de Vilalba pola súa colaboración e, como non, ao público asistente.
Ata a próxima!!!
VIDEO RESUME>>>>> https://www.facebook.com/watch?v=468111643053893