A presentación dos libros de Mero Iglesias: “Formas, figuras e sombras na Terra Chá” e do primeiro volume do “Catálogo do cantar de cego galego”, reuniu en Vilalba música, investigación e tradición oral.
A Casa da Cultura de Vilalba acolleu este venres 18 de setembro a presentación dos libros de Mero Iglesias: Formas, figuras e sombras na Terra Chá e Catálogo do cantar de cego galego. Volume 1: Voandeiras, nun acto organizado polo Instituto de Estudos Chairegos (IESCHA), coa colaboración do Concello de Vilalba.
A música tivo un protagonismo especial desde o comezo, con interpretacións de repertorio medieval e tradicional, e coa participación de Miro Casabella, acompañado nalgunhas cancións por Sara e Nerea, cuxa presenza contribuíu a crear ese necesario diálogo entre música e palabra que caracteriza boa parte da traxectoria de Mero. A presentación, conducida por Marisa Barreiro, deu paso ás intervencións de Alfonso Blanco Torrado, Mero Iglesias e Xosé Quintas Canella.
Alfonso Blanco salientou o valor de Formas, figuras e sombras na Terra Chá, unha obra vinculada á memoria da olería de Bonxe e, especialmente, ás figuras de Indalecio Lombao e Pepita de Bonxe, reivindicando o recoñecemento do seu labor, e subliñando a importancia da paisaxe da Terra Chá e da súa memoria como elementos fundamentais da identidade colectiva.
O libro, máis que un estudo académico sobre a artesanía do barro, constitúe unha memoria afectiva da relación de Mero con Indalecio e Pepita de Bonxe, incorporando ademais arquivos sonoros accesibles mediante códigos QR, fondos recollidos por Mero Iglesias e depositados no Arquivo do Patrimonio Oral da Identidade (APOI) do Museo do Pobo Galego.
Pola súa banda, Mero Iglesias agradeceu a presenza do público e das persoas participantes, así como o labor do IESCHA e de Xermolos. Na súa intervención explicou diversos aspectos do traballo desenvolvido nos dous libros e reivindicou a necesidade de recuperar e valorar os oficios tradicionais. Neste sentido, chamou a atención sobre a importancia de volver mirar cara ao barro e á cerámica fronte á progresiva substitución destes materiais polo plástico. Tamén defendeu a independencia da cultura fronte aos poderes establecidos e reclamou o recoñecemento para figuras como Pepita e Indalecio de Bonxe.
A segunda publicación, Catálogo do cantar de cego galego. Volume 1. Voandeiras, recupera e sistematiza unha parte fundamental da tradición oral galega. Este primeiro volume aborda a figura das cegas e cegos cantores e propón unha catalogación dos xéneros recollidos.
Xosé Quintas Canella destacou a amizade con Mero e o pracer de participar na presentación, subliñando a capacidade das palabras para, cando se xuntan harmonicamente, converterse tamén en música.
O acto desenvolveuse nun ambiente no que se fundiron música, memoria, paisaxe e cultura popular, elementos todos eles intimamente ligados á traxectoria de Mero Iglesias, figura destacada da música e da cultura tradicional galegas, que serviu tamén para dar a coñecer dúas das súas novas achegas, e poñer en valor unha traxectoria estreitamente vinculada á música, á tradición oral e á investigación e divulgación do patrimonio cultural galego.
O encontro rematou cunha nova actuación de Miro Casabella, coa interpretación da canción O MEU PAIS, recibida con grandes aplausos por parte do público, nun ambiente de agradecemento e recoñecemento ao labor de todas as persoas que, desde distintos ámbitos, contribúen á conservación e difusión da cultura galega.
Desde o IESCHA queremos expresar o máis sincero agradecemento e os parabéns a todas as persoas que fixeron posible este encontro: Mero Iglesias, Alfonso Blanco Torrado, Xosé Quintas Canella, Manolo Santamariña, Marisa Barreiro, Miro Casabella, Sara e Nerea, así como ao público que encheu a Casa da Cultura e acompañou con interese e afecto esta presentación. O IESCHA agradece tamén a colaboración do Concello de Vilalba, e valora especialmente a participación de todas e todos os que contribúen, desde diferentes ámbitos, á defensa, recuperación e difusión da nosa cultura, da nosa memoria e do noso patrimonio.
Ata a próxima!!!
GALERÍA FOTOGRÁFICA
VIDEO RESUME>>>
https://www.facebook.com/reel/1107937885509598