Os Valuros encheron de tradición e participación o Auditorio Municipal de Vilalba
O Auditorio Municipal de Vilalba acolleu un concerto de música tradicional organizado polo Iescha, pertencente ao programa TRADIGALU convocado pola Área de Cultura da Vicepresidencia da Deputación de Lugo, e protagonizado por Os Valuros, grupo de música e baile tradicional de Castro de Rei, que leva máis de trinta anos dedicándose á recuperación e difusión da música popular galega.
A formación, integrada por persoas de diferentes idades —desde veteranos ata mozas, mozos e mesmo nenas e nenos a partir dos oito anos—, ofreceu un espectáculo no que se combinaron música, canto e baile tradicional, amosando o carácter interxeracional que caracteriza o grupo. A interpretación de pezas coa gaita, o acordeón e a percusión foi acompañada en numerosos momentos por voces e coreografías, ofrecendo unha mostra viva do rico patrimonio musical galego.
O repertorio estivo composto por xotas e muiñeiras de grande tradición, entre elas a Muiñeira de Chantada e a Muiñeira da Fonsagrada, ademais doutras pezas como A Fala do Manuel, A Xota das Neves e A Muiñeira do Santo Amaro, que foron moi ben recibidas polo público asistente.
Un dos momentos máis destacados da actuación chegou cando o grupo convidou ao público a participar cantando os retrousos das cantigas. Á entrada do auditorio repartírase unha folla coas letras das pezas, o que permitiu que a asistencia se integrase con naturalidade na actuación, reforzando o carácter próximo, familiar e popular do concerto.
Especialmente emotiva resultou tamén a interpretación de O Galo Canta, protagonizada polas e polos máis peques do grupo, que animaron ao público a acompañalos con canción e xestos, provocando un ambiente de complicidade e entusiasmo entre asistentes de todas as idades.
Ao remate do concerto, Os Valuros agradeceron ao IESCHA e á Vicepresidencia – Área de Cultura da Deputación de Lugo a oportunidade de actuar nun escenario como o Auditorio Municipal de Vilalba.
Dende o IESCHA, queremos expresar o noso recoñecemento e parabéns ao grupo Os Valuros pola magnífica actuación ofrecida, facéndoo extensivo á Área de Cultura-Vicepresidencia da Deputación de Lugo, polo seu apoio e financiación, así como ao Concello de Vilalba, ao persoal do Auditorio Municipal e ao público que asistiu e participou activamente nunha tarde dedicada á música e á tradición popular galega.
Ata a próxima!!!