VAISE UN DOS NOSOS! VÁISENOS MORÓN!
Hoxe cústanos atopar palabras para despedir ao noso querido amigo Morón. Marcha un amigo, un corazón xeneroso que latexaba ao compás da gaita e do amor pola nosa terra.
Morón foi gaiteiro por vocación e por sentimento. Un dos piares e fundador do grupo folk Xorima, importante movemento musical e cultural da época, co que levou a música tradicional a moitos lugares, sempre coa humildade dos grandes e coa paixón dos que cren no que fan. A súa maneira de tocar era identidade, era memoria, era emoción compartida.
Estivo sempre fondamente vencellado á música tradicional galega, defendéndoa, coidándoa e transmitíndoa ás novas xeracións. Mais, por riba de todo, Morón era unha boa persoa. Amigo leal, compañeiro disposto, sorriso sincero e man tendida.
Vaise un dos nosos! Váisenos Morón! Quédanos o seu recordo, as súas melodías, o seu exemplo de compromiso e de amizade verdadeira.
Que a terra che sexa leve, amigo Morón!
A XUNTA DIRECTIVA DO INSTITUTO DE ESTUDOS CHAIREGOS DE VILALBA
