- Este evento pasou.
XORNADA DE ENCONTROS LITERARIOS. PRESENTACIÓN DO LIBRO “A CASA DO AMO”, DE MARÍA REIMÓNDEZ. CON LUZ DARRIBA E MARISA BARREIRO. 15-05-2024, ÁS 20:00, NA CASA DA CULTURA DE VILALBA
Maio 15 @ 20:00 - 21:30
O mércores 15 de maio de 2024 a escritora lucense MARÍA REIMÓNDEZ estará de visita en Vilalba para levar a cabo unha xornada de encontros literarios organizada pola Biblioteca Agustín Fernández Paz do IES Basanta Silva, a Biblioteca Municipal, o Concello de Vilalba e o Instituto de Estudos Chairegos. O programa será o seguinte:
Ás 11:30 da mañá María Reimóndez presentará os libros “Furia” e “Corredora” na Biblioteca Agustín Fernández Paz do IES Basanta SIlva.
Ás 18:30 a escritora participará nunha conversa co Club de Lectura (con acceso ao público) arredor da súa novela “A Dúbida”.
E para finalizar a xornada, no acto do Instituto de Estudos Chairegos, María Reimóndez presentará o seu último libro “A Casa do Amo”. Será ás 20:00 horas dese mércores, día 15 de maio de 2024, na Casa da Cultura de Vilalba, e contará tamén coa intervención de Luz Darriba, escritora, e de Marisa Barreiro, presidenta do Iescha.
Con esta xornada de encontros literarios as entidades organizadoras pretenden render homenaxe á admirable carreira literaria de María Reimóndez e aproveitar para poñer en valor a súa figura.
María Reimóndez, nacida en Lugo, é tradutora e intérprete, ademais dunha prolífica escritora. A súa obra inclúe poesía, narrativa, ensaio e literatura infantil e xuvenil. Destacan títulos como “Moda Galega” (2002), “O Caderno de Bitácora” (2004), “O club da calceta” (2006), e “Corredora” (2017). Tamén é recoñecido o seu traballo como ensaísta, con obras como “Feminismos” (2013) e “Aternativa está aquí” (2014). Como tradutora, traduciu ao galego e ao castelán obras de autoras como Salma ou Harriet E. Wilson.
A súa obra foi galardoada en diversas ocasións, entre elas o Premio de Poesía Johán Carballeira por “Galicia en bus” (2018), o Premio Pinto e Maragota por “Cobiza” (2021), e o I Premio Agustín Fernández Paz por “Fóra do normal” (2018), destacando o seu compromiso coa diversidade e a igualdade na literatura galega contemporánea.